مكتبــة الومضـات
يالجمالك بالمدارس درسوه
والصفوف ارست بحبك ترس
ورسبوا الطلاب كلهم بالأخير
خلصوها استاد عيدلنه الدرس
==============
لاتطالبني بأمر بي معجزات
لأن ماعندي كلب يتعذرك
تريد مني اذكرك شي مستحيل
غير كون انساك حته اذكرك
==============
من چفك أغار لچفك ايلوح
أكص ايدك إذا لاحتها إيدك
أكتب ما أريدك تنشف الما
ينشك دفتري وتبقه أريدك
==============
بكلبي اتسابقوا لعبوا الحلوين
خسرت كلها بالدور البدائي
واه بلا لعب صاعد على الكاس
بحلاتك ربك مصعدك نهائي
==============
اني ماشايف مثل وجهك جميل
وهيچي مثل عيونك اني ماشفت
من كلتلي اهواك مدري شبية صار
هيچي واكف وحدي وبوحدي طحت
==============
أكص الساني خاطر بعد ماحاچيك
خاطر يهي البينك وبيني
لكيت النوب عيني اسولف اوياك
كلي أشلون اكص السان عيني
==============
ياباقة ورد أهديلك اه شلون
الورد منك خجل مايدخل السلة
لأن مثلك ورد منوجد في هالكون
إذا إه الورد في عالمك كله
==============
انه من ظهرك شفت بيك الجمال
وجيت اشوفك حته اصدك اضنوني
ومن درت وجهك علي وتبسميت
شكر من وجهك طفر بعيوني
==============
تعال بكل وكت تلكاني موجود
بس كونك تجي مو ما تجيني
واذا ماجيتني هم تنحسب جاي
لأن موجود اه بوسط عيني
==============
ناذر للوطن عمري وانه الممنون
وابيع الروح بارخص لو نزل سوكة
طابوكة اشتريت وماخذت دبدوب
خفت يوم الوطن يحتاج طابوكة
==============
سكرت وكلت بلكي بسكري أنساك
صبيتك هموم بكاسي وشربتك
شربت الكاس كله وللچعب دكيت
حسبالي نسيتك بالچعب شفتك
==============
تريد الناس اسولف وانه كلي هموم
خانكني الدمع ماأكدر احچي
إذا حته الدمع من شافني بهالحال
لبس أسود علية وكام يبچي
==============
بعيونك سحر يسجدله كل سحار
واليخزرك هلاك والله يستر
إذا برمضان تطلع اه فد يوم
تشوفك عيد كل الناس تفطر
==============
مر بية نهر عطشان الك موت
يمته جروفي يرون بيك يمته
ماطاب الجرح لتشوفه ملموم
من كد الألم عظ اعله شفته
==============
كلناله حلو وبس الله يدري شلون
صرنه عيون كلنه ومنه مانشبع
كلناله الشمس بس تطلع اه تغيب
عله اعناد الشمس كل ساعة ظل يطلع
==============
إه قمة بكلشي وبكلشي ملاك
وكلشي بيك مرتب وحسب الأصول
إه غيرك من يمر كفله ناس
واه لو مريت كفلك عقول
==============
امن اعيونك أعرفك وافتهم شتكول
واقره بكل وضوح اشتكتب اعيونك
شلونك من تكلي الدنيه بية تطير
واعوف الدنيه كلها وأشبك اشلونك
==============
سلم من تمر ماتسوه دنياك
ولاتحمل زعل وتشيل غيضة
مو بيضة أطك لو سلمت يوم
أطك بكصتك عشرين بيضة
==============
انه احبك مو لأن اه حلو
چ اظن كلبك حلو وحبيتك
ومن شفت كلبك مثل باقي الكلوب
خذت كلبي اوياك هالماجيتك
==============
كتله احبك كال أدري
كتله واه؟ كال مدري
كتله كون اه بمچاني
ومرة عانيت بكثر ماچ اعاني
چاكلت اوه امداني
وامده الجابك علية
وامده اليمك خذاني
اشوية وخر
وامده الواكف كبالي
وامده الواكف وراني
==============
تالي الليل اكلهم باچر انساك
أفز من غبشة الله واحچي بس بيك
بغيرك فكرت ردت انه أنساك
طلع غيرك يشبهك فكرت بيك
==============
يالكلچ براءة وكلشي يوصف بيچ
وتشوفچ اعيون الناس المغمضة
الشارع بي صداع ايصير من تمشين
طوله ايكوم يفتر يردم ابعرضه
==============
فتت من باب بيتك والدمع سال
بچيت وطاح مني نظر عيني
عميت وردت أوصل عتبة البيت
إجتني العتبة من سمعت ونيني
==============
أشوفچ مومثل ماشوف كل الناس
لأن رقة جمالچ عالأرض تحفة
وحذرﭺ وحدﭺ بالغرفة لتكعدين
بس تصفن لحسنچ كع الغرفة
==============
ردت أبچي بوداعك بس كلت هيهات
ماطخ راس الك يمخيب اضنوني
سيطرت اعله روحي وكلت الله اوياك
ماطاح الدمع بس طاحن اعيوني
==============
كتاب اه انكتب كل شي حلو بيك
وما مليت منك من قريتك
لو أدري المكاتب منك تبيع
بعت الروح لجلك واشتريتك
==============
رحت اعزي بيوم ميتلي قريب
ولو فتت يهواي أشوفنك ردت
واه لمن جيت انه بلا شعور
بالعزة انه بأعلى صوتي هلهلت
==============
يالهمسك غنه ويالصفك موال
وصفه لكل مريض يطيب اليسمعه
واظن سين واكثر حبلت بيك
لأن دقة جمالك مو شغل تسعة
==============
لتكلي اعله مثلك ما أحصل وين
أشكر داخ منك حته كل اشكر
مو كلمن حلو ويلمع تحضنه الناس
هم كلش حلو وهم يلمع الخنجر
==============
أكلك شغلة بس ماتزعل اوياي
كبل ماكول أحلف حتى اكلك
سبيت امة محمد بالجمال البيك
اشايل من جمال اشتعلوا اهلك
==============
بده العام الدراسي وكيفت حيل
حبيبي اليوم راح ايروح مدرسته
أمشط شعري كمت وچلب اوياي
شلعته وبالعجل رحت انه قابلته
==============
أبيض مثلك ابيض ماكو بالكون
ولايحمل بياضك أي من كان
من اللبن ماخذ لون الخدود
لذلك من اضوكك ابقه نعسان
==============
أيس لاتضن ابعيني كطرة ماي
أبچيها عليك وتغرﮒ اخدودي
عنودي وما أحن لو تنزف العينين
وبضنك لاتضن ايحن العنودي
==============
صح انه چبير وعمري بالعشرين
أول مرة احس بعيد ميلادي
حسيته صدﮒ من صرتي إي وياي
وصارت كلها حلوة اوياﭺ أعيادي
==============
مركز للحسن وجناتك الحلوات
وشفافك للنحل صارن خلية
تتأثر الوجنة بخطوتك عالكاع
وتهتز كالجلي كد مـا طرية
==============
عندك نور يشبه نور الهلال
يعني اه كمر وهلال تنقاس
إصعد فوﮒ بيتك باچر وشوف
إذا مو عكب باچر تفطر الناس
==============
انه من شفتك حبيبي هميت
نور وجهك هذا لو شمس الظهر
انه لو بيدي لسويلك مقام
ومو خمس مرات اصليلك عشر
==============
اعيوني ابغير رسمك كرهن الشوف
اوعندي اخلاف عينك مالهن داعي
ولأن بذراعي اشمن ريحتك دوم
تجي ساعات افكر اكل اذراعي
==============
أحذرك لو تريد اسوي عركة اوياي
ماشايفني حقك لمن اتعارك
أشك حلكك ابوسة ومنك اخذ ثار
بلكي تهد علية وتاخذ بثارك
==============
أحبك حب ولا مر اعله إنسان
تدري شكد احبك راح افهمك
حلمت انه بالجنة واه بالنار
أكفر كمت حته اقل يمك
==============
على نار اظر ومتاني الاحباب
واندﮒ باب بيتي والكلب ذاب
اطلعت للباب عود الباب افتحه
لكيت الباب طالع فاتح الباب
==============
ابوطنة الضحكة شردت من الحلوﮒ
والعيدية دوم مزاعله الإيد
يجينه العيد چان ومامش اهدوم
هسه اهدوم عدنه ومايجي العيد
==============
شكد شايف شفايف فوكهن شامات
مثل شفتك أبد ما ملتقي بشفة
تكض اللفة تاكل من تحس بجوع
من كثر الحلاوة تعضك اللفة
==============
يا أول عشك ياخذني لبعيد
يا أول محب يحتل كياني
زعلت اوياك مرة وخلصت اوياك
واني اوياك صار وطلكاني
==============
انه البيت عندي وكلشي حاويه
بالايجار الوكت كعدني بالدار
وكلت بكليبي أسكن مايهمني البيت
طلع حتى الكلب كاعد بالأيجار
==============
كل حلو ينباس بس اه الوحيد
دخنه بيك وعدنه صارت هوسة
خدك ايكهرب واليبوسه يطيح
كمنه من ابعيد ناخذ بوسة
==============
چم محب حاول صدﮒ ينسه الحبيب
وانه من انساك اظل دايخ عليك
إه حبك يختلف فد شي غريب
حته نسيانك حلو يذكرني بيك
==============
عذاب البرزخ انه تعذبت بيك
ولكن بالكلب ظل حبك ايزيد
واذا كالولي عوفه وجنة ننطيك
أريدن برزخك أي جنة ماريد
==============
أمس اباب بيتك ضاعت الروح
واجيت انه أدور هم شفتها
أظن لمن كعدنة بعتبة الباب
رحت انه وبقت يمك عفتها
==============
جبتلي كلب ثاني بلكت انساك
صارتلي مصيبة وحبك الثاني
عليك تعاركوا هذا كتل ذاك
زعل كلبي اعله كلبي وموتاني
==============
شميتك كبل ماقاومت وياي
ولميتك نفس واتعثر بلمك
وهسه تريد اشمك خايف انه اعليك
يمكن راح اخلصك لمن اشتمك
==============
سألوني وتهت من رادوا يسألون
ياهو اه بهويتك ياإسم شلته
جاوبت بصراحة وچ افكر بيك
نسيت اسمي الثلاثي وجاوبت اه
==============
إذا عينك سفينة تسابق الإعصار
أكيد السفن يمها بلا وشك ترسي
ولأن خايف تحسدك ياحبيبي الناس
عليك الفلق أقره واية الكرسي
==============
جمالك معجزة وخدين مو خدين
كلش ضاويات ونورهن يسطع
وهيه المعجزة بخدودك الحلوات
لأن أول كمر وية الشمس يطلع
==============
بس اوياك احسن روحي تريد
وغيرك ماشفت حته انه اريدن
واكف عالمنصة ومن جبت طاريك
كمت لروحي اصفك حتى اعيدن
==============
چ انه اويه غيرك كلي اجروح
أتعنه المصايب والچم اجروحي
لكن منعرفتك كمت احب الروح
ومن كد ماأحبك كمت احب روحي
==============
شاعر عاش عمره بحسرة العوز
وشاعر بالترف من عاش عمره
شوف اه الفرق مابين الاثنين
ياشاعر تحس من تقره شعره
==============
بالحلم چن نهر دجلة بلايه ماي
ناشف ومرمية بي جثة قتيل
واسألت كالولي شارد للفرات
لأن شاف ابمايه ورقة اتكول شيل
==============
أحب روحي كمت شعلية بالناس
خل اللي يكول ايكول اناني
چي غيرك بعد ما حبت الروح
أحب اني كمت چي احبك اني
==============
أكول مزاعلك حته انه اراضيك
لأن وكت الصلح تغفه ايدي بيدك
واكلك ما أريدك خاطر اتشوف
أحبك حته لمن ما أريدك
==============
ماحب غيري أحد يمشي وياك
أغار اعليك حته من خيالي
كون اصعد واضمك فوﮒ النجوم
حته الناس جوه وإه عالي
==============
من كالوا إجه الكل طلعوا ايكرضون
والبيبان طلعت هيه والعتبة
ومن كد ماحلو لزموا سرة ايسألوه
شنهي اه حلاتك صدﮒ لو چذبة
==============
كون ايصير كلشي بعمري مكلوب
وارضه بكل شي يطلع عن أصوله
كون اول حياتي الكبر والشيب
واخر لحظة من عمري الطفولة
==============
چ محتاج اشوفك من چ
ماشوف
ردتك عين الية بوكت عازة
كزازة اه واضمك بين العيون
وياعين التغمض عالكزازة
==============
كتبت اسمك بصفحة حايط البيت
ومن حس بحنانك صار مسكين
طاح البيت لمن إه مريت
ولك حبك سطر حته الحياطين
==============
أحس بطعم شوكك واه زعلان
ومن تبعد جمالك أكثر ايزيد
يجيني العيد أفرح ألبس الوان
واه من يجيك يلبسك العيد
==============
منهو الكالك بيك انه مجنون
ومنهو الكالك ماكو مثالك
كبل لتروح خل اتراهن اوياك
من باچر أحب اه بدالك
==============
الكالك إه حلو ماأنصفاك
واه شفاف وتموت من اللمس
مغيمة خايب واه مايع چاشلون
يمكن اه اتموت لوتطلع شمس
==============
سولفلي اعله كيفك حته اعرف البيك
واه بكيفك احچي امنين ماتبدي
رايد كلمة منك خايب اه اشبيك
وانه اباب حلكك كاعد امجدي
==============
بحلاتك سيد وينكالك مولاي
ومن كد مادخت كتلك يمولاتي
شفتك غوشت عيني وكمت ماشوف
درت وجهي صفح شافتك اذاناتي
==============
من كد ماحلو محد مشه اوياك
والماشاك هم ماظل يماشيك
إهو ماشاف دربة إتعثر وطاح
لإن كظاها بس ايعاين اعليك
==============
مو بس اني أذوب وأخدر إعليك
إمن احلم بيك حته فراشي يخدر
منو كال الكمر يفتر على الكاع
الكمر شافك وداخ وكام يفتر
==============
حلو وتتكلب ويختلف وضعك
وكذلتك طايرة وتلعب على الريح
الوحيد اه حلو ومحد يتبعك
لأن من تمر كلها تدوخ وتطيح
==============
اسه عذبني كطعني
وارافس واضحكت چي ضحك سنك
اشردت منك أحس مرتاح لني
طلعت بيك انه شارد موش منك
==============
هوه غيرك من اشمنه أموت
لكن انه ارجع عدل لو شم هواك
تدري انه اشكد احبنك بحيث
من تهد اه علي افزع وراك
==============
عليك الكلب ثابت قفل مقفول
وأموت وما أدور عن بديلك
مو وكت الصلاة بس كمت اصلي
أصلي لخاطرك حته أندعيلك
==============
وي محمد اه تتغدة واموت
والله حاير بيك شحچيلك شكول
من يشوف اطفال دمها اعله الرصيف
إه كلي اشلون يتغده الرسول
==============
يوم الاسود يوم كلبي ارتبط بيك
وساعة السودة اعله دربك من فتت
متت منك يالچ ميت عليك
يعني مرتين انه من أجلك متت
==============
ما أستثني منك كلشي بيك اهواه
وماأستثني مني بكلشي احبنك
إذا وجهي اعله كيف اختاره انه ايصير
ثق أختار وجهك حته اشبهنك
==============
من درت عينك شفت والله عيون
ومن درت الوجه شفت الشمس طلعت
ومن درت الشعر رأسا اجانه الليل
لأن خافت شمسنه وبالعجل شلعت
==============
حرت مابين شفتك والجمال البيك
متكلي اشايل من خرة بحظك
لو شافوا حلو تعضعض شفتها الناس
ومن اتشوفه إه الشفة لتعضك
==============
شيجيبك يباچر والتقي اوياك
واشيلنك كلب مابين الاضلوع
واذا باچر إجه وما جابك اوياه
أكض باچر واشيلنه من الاسبوع
==============
أحبك ماأحبك انه ميت بيك
وكلبي بغير حبك يعلن افلاسه
أمشيلك واجيك وماأخاف الليل
ولو دربك بعيد وبيه علاسه
==============
ثق لو بالعراق ايصير طوفان
ونبي الله نوح ايرد علينه
يباوع بالبشر مايلكه إنسان
ويصعد وحده وتمشي السفينة
==============
أعدك دوم أول من اعد اعزاز
واه بيا مكان تحطني من اتعد
يالأنشد عليك شما كصيت اوياي
چا هلبت علية وبالچذب تنشد
==============
تدري السبب ليش اعليك ماأنشد
لأن سلوة دليلي ورسمك بعيني
وبس يغمض جفنها إلك أشتاﮒ
واه بكل صلافة تكلي ناسيني
==============
هم تدري صرت مني اقرب امن الروح
لأن إه النفس اليصعد وينزل
وما أعرف مكانك من اعد اعزاز
بس كلش قليل بحقك الأول
==============
انه أدري شكد تحبني
بكثر ماضاﮒ الوطن طعم الأمان
واه تدري شكد احبك؟
بكثر راتب كل عضو بالبرلمان
==============
ماأسولف بيك واحسبلك حساب
انه أعرف وزنك ومقياسك
إه أصلا تافه وراسك زغير
وبس اسولف بيك اكبر راسك
==============
أشد بجروح حبك واشتهي انساك
واكول ارتاح لو مرة نسيتك
نسيتك عود لحظة وكيفت بيك
واكف بالدمع عالخد لكيتك
==============
شفتك ماكمتلي بساعة المريت
بية الصوﭺ واه من الذنب خالي
خدرانات أدري من التعب رجليك
هلكد ماتروح وترجع ابالي
==============
مدري ليش اعيونك ادوخني بيك
هيه نظرة وينخطف كل لوني
مدري بعيونك سحر يسحرني ليك
مدري هيه مچلبة بيك اعيوني
==============
أسلاك وحواجز واعمدت دخان
مامعقولة يابغداد هاي اي
كبل چان الورد مالي الشوارع بيچ
هسه بكل متر مزروع تي أن تي
==============
شوف اللعب عدهم شوف الفنون
منو يكدر عليهم برشلونة
يلزم طوبة ميسي ايخوط بالكول
والحارس يموت ويشيعونه
==============
ميت بيك ميت والنفس خلصان
واتشاهد إذا مريت بية
حالي اوياك هيچي وإه موجود
چا شيصير من تبعد علية
==============
بابك ما أدكه وإهى الموضوع
وكلبي اعله البعد كتلك قنعته
واذا مرة لكيت الباب مشلوع
يعني الشوﮒ الك هزني وشلعته
==============
كلت باچر أجيك وفرحت الروح
وكلبي من الفرح وياي طاير
شفت باچر بعيد وطول اوياي
رحت انه اعلمودك جبت باچر
==============
خليتك رسم وعيوني ترسم بيك
وغير عيوني ماواحد يرسمك
صاحوني شكثر بسمي وچ ناسيه
وكلتلهم نعم من صاحوا اسمك
==============
هاك الروح اخذها وانه ممنون
ماأنطيك عيني وماأعوفك
مو بخلا عليك وشنهي العيون
إذا أنطيك عيني ابيش اشوفك
==============
مثل لهفة سجين ايتاني الافراج
عليك انه صرت صدكني ملهوف
واذا كتلك أحبك انه غلطان
لأن حته الأحبك ناقصة حروف
==============
تعبت اوياك انه وحيل مليت
وكتله لكلبي كافي وماأريده
بديت بصفحة بيضة وكلت أنساك
طويت الصفحة شفتك بالجديدة
==============
أغار اعليك من كلبي والعيون
لذلك انه حاير وين اشيلك
وحقي ماأجيلك انه معذور
أغار اعليك مني وماأجيلك
==============
ابطولة أحله واحد إحنه فوزناك
بطل تستاهل اه الكاس چاكوه
لأن ياهو اليشوفك كال هذا ايفوز
والماشايفك هم كال إي هوه
==============
إه بعيوني وبعدني ابچي عليك
شلون لو يوم اطلعت من عيني
من كثر حبك دخت كلش بحيث
إه أندلك وادور ويني
==============
ردت احبك واستحيت وبطلت
خايف اشما أوفي ماترضالي
لأن لجل اهواي مرة اتخبلت
وكال موشي ومارضه اعله اخبالي
==============
كلبت بوراقي بس اسمك لكيت
وماكو غير اسمك إسم بوراقي
كلها كالت راقي عنك من اجيت
وكلها كالت ماكو غيرك راقي
==============
الحكومة انطت شعبها ارقام وارقام
حته ايخابر ويشرح اهمومه
شعب خارج نطاق التغطية ايعيش
إذن شيسوي بارقام الحكومة
==============
ماأشوف شكد علي مروا ألوف
كلها مو بالبال واه ابالي
اه بس اشما ردت عنك ألوف
اشما أفر راسي تصير اكبالي
==============
غيري ماشافك وغيرك ماأشوف
إه كل الكون تتراوالي
إه لو مو انه مالك كل وجود
وانه لو مو إه أعمه شحالي
==============
انه لو جيتك أجيلك جاري ماي
واشيكضه الماي كلي لو جره
وعنك انه اشما رحت تلكاني جاي
من كثر ماحبك ارجع لي وره
==============
انه مدري اشلون ظلت بية روح
من خذنك بالحلم ذرعاني
أحچي بيك الساني ماسمعني صوت
ضل عليك ايغار مني لساني
==============
مابدلك لأن ربك أمرني
إذا يخلقلي ثاني ايجوز ابدلك
واذا بدلتك اني افترض فد يوم
هم اكره بديلك حته اردلك
==============
أحبك حب ولامر اعله إنسان
تدري اشكد احبك راح اكلك
لو إه حبل وتشد ركبتي
واحس بروحي تطلع ماأفلك
==============
كبل چ انه احبك چ دايخ بيك
أحبك حب نظيف وخالي من الغش
بس هسه مااحبك هسه اموت اعليك
مو كلش أحبك زدت عالكلش
==============
من ظيم العلي ظليت ابيع اهموم
واسعار الهموم مسجلة بخدي
الرايد حزن ياخذ حزن ويروح
والرايد فرح يعذرني ماعندي
==============
يومية الصبح أسمع خبر موزين
ويومية العصر أسمع فجيعة
عراق وكلك اسود حته الاخبار
الابيض بيك بس وجه المذيعة
==============
اية من الجمال ويصعب التفسير
وشنو انه وافسر للخلك اية
إجه مره كعد يم المراية احتار
د روحه اعله روحه وباس المراية
==============
ماندﮒ اعله الخشب لمن تفوت
نضرب اعله الوجه مدري شبينه
تحتيي الموته ولا واحد يموت
لو تجي شفافك اتبوس بينه
==============
اسنين الم بشعرك وشعرك طويل
الله ياشعرك يتعب مني
ربعه لميته وبعد ماظلي حيل
لو ألمن بعد تعمه عيوني
==============
مرة مدري اشبية جيت امشي وراك
جيت اشوف الناس الي يحبونك
حقها هاي الناس مجنونة بهواك
تغار عينك لو تشوف اعيونك
==============
من تفتح عين تضوي دنيتي
من تفتح ثنين نار وتشتعل
كلت خل اوصف جمالك يالحلو
واه شيوصفك إذا تكتل كتل
==============
لاتظن انساك يالرايد تغيب
ولاتظن اطيب كلبي اجروحه
إه روحي اتريد اكرهك مستحيل
وهم شفتلك بشر يكره روحه
==============
الناس تخاف ماتحمل هويات
الهوية بجيبهم صارت منية
ذبوها المنية وطلعوا الناس
لكوهم جثث مجهولة الهوية
==============
هذوله من طغوا صحنه لهذولاك
أجو عالصوت فورا واخوله
واجت نفس الوجوه وذولة ذولاك
نصيح المن ونخلص من هذوله
==============
دمك نفس دمي وثبت بالتحليل
وچذب لا إه اخوي ولا إبن عمي
صرت نفس الفصيلة وياي تعرف ليش
لان خلصت عمرك تشرب بدمي
==============
عشرة اويه المناية ورفكت ادروب
مثل عشرة شذر وية المحابس
اتركن ماي النهر ماتغفه عالماي
على اكبور الشباب اتحط نوارس
==============
علامة بكل درب صرنالك شلون
تمر وتكول ماشفت العلامة
يتامه ونظر جيتك واذا جيت
يبين العيد بوجوه اليتامة
==============
بعيد الله الچبير اتعيد الناس
وكبل العيد كلها اتخيط هدوم
وانه بكل عيد اظل مدنك الراس
وادية مزرفة امن خياط الهموم
==============
إذا شمسين تطلع كارثة اصير
وجمالك هذا كلي منين جبته
اتفق وية الشمس لدوخ الناس
لوتطلع شمس لوتطلع اه
==============
حبا بالشعب واتحده الارهاب
وعن هذا كلامي انه مسؤول
كطعت الكهربا عنكم يالاحباب
ماأرضه عراقي يموت منل
==============
ملينه الخطب ملينه الاعذار
صدكني بعد عذرك ممقبول
إذا عندك بقت ذرة كرامة
عزلها الوزارة وشيل التيول
==============
مو صوﭺ البلم من غرﮒ الناس
الناس أصلا هيه غركانة
ولاصوﭺ الحرامي الباﮒ هالبيت
راعي البيت نام وناسي بيبانه
==============
حط اذنك على كلب المسلم
وركز واسمع كلشي زين
متأكد من تسمع كلبه
اتسمعه يدﮒ حسين حسين
==============
إذا ناوي تحب وتكون ولهان
لاتخفي خجل بيك المشاعر
واذا قصدك تحبني كون يفلان
حبني انسان لتحبني كشاعر
==============
من مرنه الشته وماعدنه قمصان
ندفه على اوراق الجرايد
وماننشر بعد بس نحفظ اشعار
شفنه النار تاكل بالقصايد
==============
بس باوع علي وتبين الاعذار
مامحتاج منك كلمة تتعذر
من وجهك واعرفك بيك محتار
معقولة الغدر مايعرف الخنجر
==============
مرت سنة من العمر مرت كبلها سنين
منه چنه الكبر بس هسه متندمين
جبنه العمر نظر قانعنه چان الصبر
باچر يكول الفرح والباچر متانين
==============
كاعد بس اشوفك إيد فوﮒ الإيد
ومفن بجمالك والكلب يسعر
تكرب يمي خدك وانه اكلك روح
أخافن بس ابوسك يصعد السكر
==============
من اول مشفتچ وانه هايم بيچ
دخلتي بكلبي شبسرعة سكينه
عيد الحب يعيد بينه اظن بس يوم
أشو وياﭺ كل عمري فلينه
==============
المثلك مايخلي تشوفه عين الناس
يظم روحه ميطلع بالشهر ساعة
لأن اتعم علينه وملحدين انصير
إذا شفناك نكفر حته بالطاعة
==============
لاكف كبالي وتدري كلش زين
امن اشوفنك اتلعثم كلي وي كلي
ولون عندي جمالك والترافة البيك
أموتها الشباب وزلم ماخلي
==============
راضي انه بقسمتي وشاكر اهل البيت
وماريد المكان النفسك تقبله
يامعمل كراسي وياحكومة خير
فدوة الشعب رايد حته لو طبلة
==============
بخيت الشاف وجهك لحظة باليوم
جمال البيك عجبة يوكع بساع
لتلوم الكلب مو وحدة معجب بيك
إذا بچعوب رجلك معجبة الكاع
==============
مجنون بجمالك انه ياقيس
وماصل جمالك ليلى بالكون
من اتفوت ليلى اتشلع الكلوب
واه اويه الكلوب اتشلع اعيون
==============
لاتصعد درج يالكلشي مايع بيك
بالله اعله الدرج وطشرت كلك
شعدك عالسطح والشمس تكتل فوﮒ
لاتصعد نصيح السطح ينزلك
==============
يالرايد تسافر مني مليت
واحسك ياترف من يمي طافر
لواشنطن تسافر اه ميصير
واشنطن إلك لازم تسافر
==============
أكرهنه اليظل يدلل اوياي
بس اه ولك يعجب دلالك
انشلع كلبي بجمالك شحچي وياك
إذا مشلوع كلبك من جمالك
==============
صديقي ايبيع طرشي وواكف السوﮒ
وكتله شبيك باقي وهوه يمشي
ولك صورة مهند حطها عالچيس
مو بس يمشي صدﮒ يركض الطرشي
==============
ماأكتب قصيدة اعليك للدوم
قلمي اوياك ابد ماكعد حظه
باول بيت أكتب واه عالبال
ومن اسمك أكتبه تصير ومضة
==============
أخاف اعليك حته امن الهوه الهاب
وكضيت العمر كله اعليك خايف
شفتين البشر تملك بالوجوه
واه منين ماكلبك شفايف
==============
ياكلشي وكلاشي ويااشكال ارناﮒ
طفل كلبي تعده وشاف دكانك
ظل واكف ابابك كتله اخذ شتريد
شو رادك شلع وي قطعة اعلانك
==============
اختصر ربك بعينك كل جمال الكون
وبخدودك ترافة الماحواها انسان
موش السان واحد يكفي يوصف بيك
اليوصفك بعد يرادله الف السان
==============
يمن بيك الجمال اتعده الحدود
ومن خدك خذوا لمعات النجوم
نحضر اهدوم حلوة لخاطر العيد
واه العيد لجلك يشتري هدوم
==============
وي كلبي امن اسولف تسمع اه شلون
چ وين اه كاعد والحچي اسمعته
حيرني الأمر بس طلع بية الصوﭺ
أسولف للكلب والكلب ثاري اه
==============
شككت الرسايل حته أنساك
ومن بالي شلت كل العناوين
لكيت اسمك على الحيطان مك
أدري شلون افلشها الحياطين
==============
صفات البيك ماشايلها إنسان
ولاتكدر على اوصافك قصيدة
العسل لو يوم صدفة اتلاكه وياك
يمد ايده عليك ويلحس ايده
==============
رئيس الدولة شاعر لو يصحله ايصير
لأن شاهد بعينه وعاين الحالة
تمثال الرئيس انداس بالرجلين
والشاعر بقه وماطاح تمثاله
==============
أبعد ياحزن خليني مرة ارتاح
خل مرة بحياتي أفرح بروحي
جبت اسنين عمري بس اصب ادموع
أشل اجروح غيري وأنزف جروحي
==============
مسجون الصدﮒ ياناس تدرون
وخذوا كل الچذب طلقوا سراحه
كل تعبان كالوا يبقه تعبان
والمرتاح يحتاج استراحة
==============
اه يالانواع بيك من الجمال
كلي هم تنباع حته انه اشتريك
يم المراية تجي تباوع الناس
واه المراية تجي تباوع عليك
==============
وصل حبي إلك حد ماهو معقول
بحيث اوياي إه وانه مشتاﮒ
تشابكني وتشاقيني واشاقيك
واصيح الله اكبر بسك فراﮒ
==============
من كد ماحلو من تطلع ايخطفوك
وكل صيف التمره ينكلب أشه
شفت ع البشر لو حطت الرجلين
الشوارع بيك هيه تكوم تتمشه
==============
إه بلايه صوت معذب الولهان
واذا أحد يسمعك مات هالأحد
وانه بغير صوتك شالع الإذنين
واحس انه بغيابك ماكو چن محد
==============
إه بلايه انه محد انصير
وانه بلايه إه أبقه محد
مو حزورة هاي تريد تفسير
إه وانه واحد يعني ننعد
==============
ماترهملي بس تفصال احس بيك
ومر تكتل واضوكنك اشمحلاك
هله بجيتك أصيح وإه ماجاي
واقشمرني واكوم اشباﮒ وياك
==============
يمي بس صعب مو سهل ينلاح
وافكر بيه دايخ يمته الوحه
من كد ماحلو ومدوخ الناس
من كد ماحلو داخ اعله روحه
==============
تظل اه الهوه ونفسك دوم
ودنيانه حبيبي اه شمسها
كبال المراية تجي وتتعدل الناس
والمراية كبالك تعدل نفسها
==============
رقيق اه وحلو شخصك يشفاف
يالعينك بحر وسهام رمشك
شما وصفك حبيبي مقصر اوياك
إذا حظنك إلك رايد يحظنك
==============
لحيت اعله ابويه وكتله بيع البيت
يمهم بيت بويه وخاف يتأجر
فرح والله أبويه وكام يطي الوان
طلع حته أبويه اعليچ هم يفتر
==============
السر بمحبتك من اريد انساك
شما أنساك احبك أكثر وأكثر
أنسه وأنشغل وبعزة النسيان
أتذكر نسيتك وارجع اتذكر
==============
إذا ساس البشر من الرمل والطين
إه من الذهب بس منصنع ساسك
واذا تسعة من عشرة ليوسف الحلوين
إه العشرة كلها بشعرة من راسك
==============
تكدر بچم فلس تشري المستحيل
بس تره الأخلاق ماإلها سعر
سلم القمة يريد العنده حيل
ويصعد بأخلاق بعدين الشعر
==============
تعرف كلشي بية وماعرفت اشبيك
لغز حلك لغز من يكدر يحلك
راح اشرد واجيك ومدري ليش الخوف
خاف تخاف مني بسدك اختلك
==============
أكولن راح اسولف كلشي من الكاك
واصفن وانشده من اكعد بكربك
هلكد ماأحبك خلص حته الشوﮒ
ماحبك كمت من كثر ماحبك
==============
يلنك مو مثل كلمن مشه اعله الكاع
ولا وصفك سهل لمن يوصفونك
من ضحكة عيونك شفنه وجه العيد
چا شنشوف لمن تضحك اسنونك
==============
ماد عدل ماشيها لتخاف
من خصمك وابد لتشيل همه
بس الحذر واجب لأن نوبات
تره الرجلين منهم تجي الحمه
==============
مو كلمن يدكلك صدره وفاي
ولا كل أخ صدﮒ أخ ايتسمه
أحيانا عدوك ينصح اوياك
وبزادك أخوك ايخلي سمه
==============
كتبت اسمك اعناد بورقة الشمات
كالوا ينمسح وتراه يبقه
رادوا يمسحونك بلكت انه انساك
حروفك چلبت وانمسحت الورقة
==============
ربع حبي يعادل كل اللي يحبون
ونص حبي إلك ماحبتك أمك
من تنجرح إه يسيل منك دم
دروح افحص وشوفه دمي لو دمك
==============
إذا فعلا تحبني هذا بيتي كريب
جيب اهلك تعال ويالله خطبوني
ولتكلي تعارف نرتبط بعدين
تره صارت قديمة وداعت عيوني
==============
من جاني الخبر كالولي إه هنا
تمنيتك بكربي وحيل اشمك
وبلهفة إجيتك واسرع من الصوت
لكيت كليبي واصل كبلي يمك
==============
إذا بس مرة احبك كلشي ماسويت
واذا مليون احبك يعني ماحبك
يمعود دخفف من جمال البيك
العالم من جمالك كامت اسبك
==============
لأن مشتاكلك قررت احاچيك
وعليك انه اسألت كل ضني ألكاك
وكفت اباب بيتك عود اتانيك
شفت ضلي طلع يتمشه وياك
==============
اويه غيرك بالحچي من احچي استاد
وافلت بالحچي من احچي وياك
تسواني وتسوى الراح والجاي
وتسوه الكلشي إه وحته تسواك
==============
اشلعت كلبي واكل الناس مرتاح
واحس انه صرت بيدك مراجيح
وسلني تمرجحك بيه صرت خيط
وافكر بيك خاف انكطع واطيح
==============
من كثر الحلاة تشرﮒ لهات الناس
واليشرﮒ يصيح الماي الحكوني
وانه شلون بية من حلات البيك
ماشركت لهاتي شركت اعيوني
==============
شفتك مشتعل ردت انه اطفيك
ولأن رجلية ميته ازحوف اجيتك
ومشلولة الإدين وصعبة اشيل الماي
افتحت شريان كلبي وبيه طفيتك
==============
إذا موبيك اسولف يعني ماموجود
لأن بس بيك اسولف كل وكت انه
تدري اه بمكانك بية وين ايصير
بس شوية اوخر تطلع اهنانه
==============
يبو شعر الذهب لاتمر بالبستان
لأن تصفن بطولك هالنوا
يوسف من جماله ابير ذبوه
عجب لي هسه اخوتك مالكوا بير
==============
يالكلك حلو وبالحسن ماتنقاس
وتنكط عسل من جدمك لراسك
قيس اه النحل شافك خطف مريت
د نفسه عليك من الحلك باسك
==============
شيرسمون منك إه مامرسوم
سراب تصير بعيون الينظرونك
رادوا حاولوا بس تدري من رسموك
خيط ومسطرة وماجابوا عيونك
==============
أمس روحي بشقة ضلت تسب بيك
أبچيها ردت كمت الچم جروحي
وتعاركت اويه روحي وصارت ازماط
ومن كد ما أحبك طلعت روحي
==============
خطية اعيوني شبكت طيفك بنوم
صحيت وردت افكها مخيطة اخياط
نفط وادموع الك رشيت الهدوم
فرحني تعال بعود شخاط
==============
كلش دخت بيك منين مخلوق
إذا من طين اشكن كلش بهاي
كلها بماي تسبح تنضف الناس
ومن ايلوح جسمك ينضف الماي
==============
نضحك بالچذب ونضمضم الدمعات
ومكابر نشد احزامنه البايد
چم دوب الصبر نكضي العمر صيام
والعيد اليمرنه اتقشمر انعايد
==============
شفت حسنك متت كلش واهيت
وكمت افر بيدي ولك خايب شفر
الشامة لبخدك ولك مو شامة هاي
هاي انه ابوستك ماخذ صفر
==============
يالوجهك بالشمس من وصفوه
والشعر چن الشعاع ونوره
كال خل ناخذ صور للذكريات
كتله وجهك يحركلنه الصورة
==============
بيه كل التعب من هذا الزمان
تعب أكبر من حدودي وطاقتي
ردت اخذ راحتي مرة ابتليت
طلع واحد غيري ماخذ راحتي
==============
انه دوم الهج بإسمك مانسيت
وصار حبك بيه أجمل سولة
وحته من كد ماكمت أصفن عليك
وحدة من اعيوني صارت حولة
==============
حلو كلك حلو بس احله مابيك
محد بالحسن شايل صفاتك
العسل بس العسل يتشابه اوياك
لأن شافك حلو صار بحلاتك
==============
عفتك بالشمس حته اسمر اتصير
واعيون الحواسد تكطع النظرة
رديت ارد اشوفك من وصلت الكيت
وجهك ماتغير والشمس سمرة
==============
من جمالك كلها وكفت
وانه كاعد مستريح
مو لأن مامبهلك
لأن بس اوكف أطيح
==============
خطار الحزن يومية بالبيت
ولامرة الفرح مر بية خطار
وعزيمة للفرح فد مرة سويت
تيه باب بيتي وراح للجار
==============
أحبك كلمة بس بلساني ماكال
أتهجاها كوة ويمك انساها
أشوفك أنسه روحي وانسه كل الكون
چا هالكلمة هاي شلون أقراها
==============
ماأدري شيصير بحالي لو مريت
أتراعش أكوم وعيني ماتغفه
ومن الزم چفوفك أبرد بتموز
چا بية شيصير امن الزم الشفة
==============
حاچيت الكمر بالظهر كتله اشبيك
شمالك بالصبح ماتطلع شوية
جاوبني حبيبك للدوام ايروح
وماترهم تلمنه اثنين صبحية
==============
موش اعيون عدنك صدﮒ اولايات
تفر بيها القوافي والشعر يبحر
ردت مرة أوصف اعيونك احتاريت
بديت برمش منك خلصت دفتر
==============
لبست اسود مثل كل اليلبسون
ونويت احزن مثل كل اليحزون
علية شماله الاسود لعب الروح
وعليك اه شحلاته يجيب العيون
==============
صح اي جميلة وطولچ شمحلاه
بس عندﭺ غرور وخمشمچ شعلوه
أنصحچ هالتكبر مايفيدﭺ يوم
لأن أصل الاضع كمل الحلوة
==============
ردت أكتب شعر بي تفرح العين
وردت غير الحزن والدمعة موضوع
وبديت انه بقيصدة اتنكط افراح
ومن كد الفرح هم طاحت ادموع
==============
إنحب ياوطن واكضيها اهات
وبعد لاتنخه ولدك مالك احد
صحيح اسلام ونحب الصلاوات
بس للأسف مانعرف محمد
==============
شوصفك ياترف ياعسل ياشفاف
عن كل البشر متميز بميزة
الوادم من تسافر تختم وتأشير
واه امريكا لجلك تدخل بفيزة
==============
قرينه بالدروس غراب عطشان
حط اخوانه بالجرة وطلع ماي
وقرينه بالطفوف حسين عطشان
حط اخوانه كلهم ماطلع ماي
==============
خطية شكد ابويه مصدﮒ بلير
وعد يبني الوطن ويشغله حارس
عشر اسنين نام وإكعد وشوف
تلكه الدولة بس تصبغ مدارس
==============
چا دمعتي ابعيني بت بيت
واضن حته الرمش مايدري بيها
هسه الدمعة ضلت كاضة الباب
الرايح واليجي يباوع عليها
==============
كلمن مدلي چفه وكضلي اقليم
وعلى لوح الوطن مارسموا الساس
وهلكد ماتجر اچفوفهم بيه
شكوا خارطتنه وطاحت الناس
==============
كد طحت ماشفت وجهك كام
هاك ابسط مثال وشوف وتصور
ولك خشبة بطبر فركست چف حطاب
من شافت حطب كدامها اتطبر
==============
من كد ما أحبك صرت دايخ بيك
صوتي اتغير ووجهي ونبض كلبي
والساني بعد مدري شجراله النوب
يمكن راح اصيرن أشبه اللمبي
==============
ماكلك أحبك چي صريح اوياك
واه البية عايش تعرف البية
إذا اكلك أحبك أنحسب چذاب
لأن مو مرة احبك لا900
==============
اتحبني ماتحبني انه اموت اعليك
ايعجبك مايعجبك هو هذا انه
انه من انه أبطل لو لكيته بيوم
وي غيرك يسولف واكطع السانه
==============
بوسة انطيني كتلك ماكفرت اشصار
كلت ل علية وكبت الهوسة
حلكك بي اشكال انطيني خدك عاد
وچنك ماشفتني وماخذ البوسة
==============
صاير جلد باب البيت وياك
مدري شلون يتحمل لزمتك
واحنه البيت يهتز لو تعديت
وناس بناس كع من خطفتك
==============
انه ماشايف تره بعيني أكيد
وهايه عيني تشتغل بس عالرمش
هسه شفتك إي صحيح وكمت اشوف
ومن كثر ماركزت طاح الرمش
==============
مايسوه البچي ولاتسوه الاحزان
ولايرهم الهم ودمعة العين
لو يسوه الحزن صدكني والله
چا عاشور رجع إلنه الحسين
==============
من يمر رمضان حاول لاتصوم
إه مو واجب شهر رمضانك
لأن بشفافك عسل داير عليه
يعني تفطر من تضوﮒ السانك
==============
كبل الجدري بس اعله الجلد صار
بس هسه الضماير صابهن جدري
بميلاد ابن مريم تدري كلها الناس
وبمولد محمد كلها ماتدري
==============
جميل اه بجمالك دوخيت الناس
وياهو الشاف شخصك صابته الجلطة
يمعود دخيلك روح طب للبيت
شفت دعوة عليك بمركز الشرطة
==============
مرة الكمر شافك من طلعت بليل
ضل يحرﮒ بروحه وجر ألف حسرة
صفن صفنه اعله نفسه وكال مامعقول
أكو غيري حلو موجود بالبصرة
==============
وين ماألتفت بعيوني تصير
ويمته ماأبچي على خدودي تصب
بعد شلي بعيني يالصرت اه عين
أخذ عيني وخل اشوفك بالكلب
==============
انه مال انساك أكبر مستحيل
بية كل دكة كلب تحتاجلك
وانه ما أشتاكلك تدري اه ليش
لأن ماناسيك حته اشتاكلك
==============
من تمشي وتدوس برجلك اه ترات
يطلعلك زمرد صافي من يلمع
هاي برجلك وهيچ التدوسه ايصير
إذا لحت التراب بشفتك شيطلع
==============
مرهون بجمالك بس ير اجناح
شفتك مرة وحدة وبعد ماعفتك
عينك ليل ظلمة ووجك تفاح
وشفتك ياغزال مطعمة بشفتك
==============
كل عيد اليمر واجب أعيد الناس
واسلم عالحبايب واحدا واحد
بس اه سل يختلف عالناس
أشكن صدري ولكلبي اعايد
==============
سولف كول الك واهس تضل وياي
واذا ماإلك واهس كول لاتخجل
ما أقبل أحبك واه مامرتاح
وما أرتاح احبك واه ماتقبل
==============
انه ماصدكت إنك خابريت
من طلع إسمك نفض جسمي نفض
وايدي مالحكت تفتح إتصال
اتخربطت وضعيتي وانطيتك رفض
==============
شفت إبنك عطش فكيت باب العين
من ماي العيون الغالي شربته
ومن شفتك جعت ماچان عندي اطحين
عج ابني الزغير وچيمت بخته
==============
من يوم الهويتك ماأفكر بيك
رغم شوﮒ البكلبي الصار الك وحدك
مافكر بشخصك مو لأن ناسيك
لأن ابيش افكر والعقل عندك
==============
القناعة اتضيع مني امن التقي اوياك
وعيني لشوفتك ماعاد تكفيني
ولأن يرادلك عين بكبر بغداد
راح بإيدي اوسع خارطة عيني
==============
أحبك مو مثل باقي اليحبون
مجنون وعثرله بخيط مجنون
إذا طيفك يجي أرميله چيلات
واذا إه تجي شرميلك اعيون
==============
إه غير الناس عنهم تختلف
وماكو صورة تشبهك بكل الصور
الكمر يصعد للسمه حته يصير
واه نزلتلك وصرتلها كمر
==============
حبيبي العيد بعيونك والخدود
واذا تضحك شفافك ينچفي العيد
أريد اشرب شعر من هاي الشفاف
واصيح الله عليك وشفتك اتعيد
==============
صحرة ومتانين ماتمطر شجاك
تدري عطشانين الك منذ الأزل
واه رحمة ونزلت اعله وابوك
واعله هاي الفقرة ظيم الله نزل
==============
أتنطر تجي وبس بيك اسولف دوم
والم اسنين عمري وبيك اطشرهن
يالعيونك خضر ورمشومك اتصب ماي
مو طلعت شمس ماتطلع اتشرهن
==============
انه لوكتلك أجي معناها جاي
واه مامرة كلتلي وجيتني
مرة أذكر بالحلم كتلي تعال
واركض بنص الحلم خليتني
==============
انموت فدوة ألمهم عمرك يطول
لخاطرك صار الچفن ملبوسنه
إه تجرحنه ونكل للناس لا
الوطن مايجرح يريد ايبوسنه
عالسمه مو عالورق نكتب عراق
حته من نقراها نرفع روسنه
==============
أريد اكتب شعر بوصافك ومحتار
شكتب عن اشفافك لو كحل عينك
إذا كلك حلو وبالوجنة نور ونار
يمكن من حليب الله خلق طينك
==============
إذا رايد تسولف سولف بماعون
عسل كلمات ثغرك لاتبديهن
واذا دمعك نزل قارورة حط للعين
دمعاتك شذر مو كفر تبچيهن
==============
اشهل بياض البيك شتسوي تعال
فوكـ هذا ولازم مراية بديك
عمي لو عدنه مثل وجهك حرام
انذب المرايات ونباوع عليك
==============
واجب انبوسك إذا مرينه بيك
ايطبه طوب الخلفك لو مارضه
ايحطك ابيته ويظل قافل عليك
ومن وره الشباچـ ونبوسك قضة
==============
أحبك ثم احبك ثم عراق النبلاء
ماترهم أعوفك وانفرد وحدي
منو بكدي يحبك دور اتحداك
أمك لاچذب متحبك بكدي
==============
لاتروح لأي عرس خايف عليك
ودير بالك لمن يعزمونك
الناس عطشانة شهر شربت بديك
خاف شربت ماكو ويشربونك
==============
إكعد يافرح مارح ينزلوك
كافي من الملامة انفخت راسي
خطتنة هذيچ وحلها مكشوف
دومك إحتياط ومو أساسي
==============
إتحقق حلمنه ورحنه كليات
كلنه نشوف بيها العالم الثاني
بس ماندري بيها تنفجر عبوات
وانحصل شهادة موت رباني
==============
من اجروحك أنه الماچ امل مليت
وجبل شوكي تبايد ونهدم سفحه
ومن كد مافتحنه لغلطتك صفحات
بسجل اوراق حبك مابقت صفحة
==============
فدوة اسلك لاتزعل اترجاك
ولو أدري بزعلتك انه راح انذل
خل انذل اولي يطبني مية طوب
بس هيچ ابحلاتك كفر من يزعل
==============
من طبعي امن اشوفك لازم ابچي اعليك
واه تكلي إسكت حتى احظننك
شلون اسكت واشوفك واه دمع العين
إذن أبچيك لازم حتى اشوفنك
==============
تريد انساك چا عاوني أنساك
بشرط كون اه تظمن أنسه طاريك
كلت ماأحچي بيك كبال هالناس
كمت چي چذبوني وحلفت بيك
==============
إه مو مثل البشر لا مستحيل
إه صح شكلك بشر بس يختلف
إه أقوى انسان كد ضعيف
بنظرة من نظرات عينك يرتجف
==============
شلون تعقلها انه اعوفنك واروح
يالسك بروحي وبوجداني
مرة صاحوا بسمك وكلت اني ها
لو يكولون اه معناها اني
==============
أحبك ماأحبك والله حرت اوياي
بيك انه حرت واه ولا چنك
ساعات انه اكولن انه احبك ليش
وساعات انه اكولن ليش احبنك
==============
ماعد اويه الفرح والوعد صار سنين
لامر عليه بحلم ولاشفته شوف العين
ناشدت وين الفرح كالولي متأسفين
ممنوع هسه الفرح عن العراقيين
==============
تصح ومضة شعر تفرش دواوين
ويصح ديوان ما يفرش حصيرة
وتصح كومة زلم ماتسوه فلسين
ويصح مثلك أخو يسوه العشيرة
==============
لاتدنك عالذهب لو شفته طاح
هوه يخضعلك إذا شافك قنوع
وجوة تمثال الثلج لاتستراح
لأن بس تطلع شمس لازم يموع
==============
ما أركض واطيح وبية اشمت الكاع
مو انه اليطيح وكلمن يفوته
أركض بالع لو دار بيه الكون
أصير انه اليهد والناس مشحوته
==============
من كد ما أحبك بس اسولف بيك
وكمت بيك انه اسولف حتى بالسكته
من سألوني شسمك تعرف شرديت
بسمك جاوبت حتى اسمي تيهته
==============
كمت اغار اهواي من عندي عليك
وأي جزء مني عليك يعاني
ولأن يحچي اهواي وياك اللسان
كمت اسولفلك بدون الساني
==============
شفناك وسكرنه بهاي شتكول
على هذا الأمر حاسب هناك
الله يساعد الصيام عالصوم
مفاطير وفطرنه بيوم شفناك
==============
أحير منين ابوسك من الاكيك
ولو بيدي عليك امطر شفايف
أمس سولفت يمي وصار ما صار
مشيت وكمت ابوسن بالسوالف
==============
إه أكبر معجزة ودوخت كون
ويلي غصن البان من طولك خجل
انه ماشايف صبع ينكط حلاة
ومن يجيس الماي يتحول عسل
==============
تكلب بالجريدة اچفوفها الحلوات
وذاك اليوم چا قاسية اعلينه
مو زينة الاخبار الصادرة و مأساة
وبس كضتها كلها تحولت زينة
==============
كلش مختلف ماتشبه الناس
وجمال البيك ما موجود بالكون
طاحت عيني بيدي بيوم مريت
ما شايف جمال ايطيح العيون
==============
ماشايف جمال بهاي الاوصاف
شو كلك حلو وعيونك اوساع
انه ادري الكمر بالسمه كاعد
معقولة الكمر نازل عله الكاع
==============
إبعد لاتجي وتتقرب اترجاك
جمالك صاطع اه وخاف يأذيني
شافت شمس عيني وكلشي ما صار
وشفتك من بعيد وغوشت عيني
==============
إذا من نضرة وحدة رجف كلبي تكول
وحبيتك كلت صرت اه خلاني
انه من المهد مر علي طيفك كال
لو هذا التحب لو ما تحب ثاني
==============
شفت الشمس غابت مدري شنهي الصار
بظهر الصيف احس الناس بردانه
لن وجهك حبيبي ضوه كل الكون
وغابت هالشمس ثاريها خجلانه
==============
اقبل اي جرح بس جرح الاحساس
يظل ينزف عمر لو بشر داسه
ميضوج الورد لو داسته الناس
بس يضوج اذا الفلاح داسه
==============
من طبعي شرس وتخاف مني الناس
بس منك اخافن من الاكيك
أشرد منك انه واختل انه اوياك
وتشرد بية إه وبية اخليك
==============
من شفت الدمع سايح عله الخدين
أصدﮒ ماأصدﮒ دمع بجفونك
طلع كلبك ثلج وانصهر من الشوﮒ
ذاب من الخجل واستقر بعيونك
==============
من شفتك حبيبي ارتجت اعضاي
ومدري شوكع مني بكد حنيني
دخلت البيت دايخ راسي مسطور
دﮒ الباب واحد جاب عيني
==============
دوس اعله الورد كام الورد ينداس
بس عطر الورد ماتكدر اتدوسه
يصح واحد جريمة من الوجه ينباس
وواحد عالرجل يستاهل تبوسه
==============
يومية اعله مودك عركة انه اوياي
واتعارك اوياي وأنذبح دونك
تعال بلا عيون انوب اذا مريت
لأن هاي الطلايب من وره عيونك
==============
يالطعمك عسل ماترحم العطشان
ولو كطرة نده اشوي خاف من ربك
نصبك بستكان الچاي چاي اغروب
من كثرة حلاتك چاينه ايشربك
==============
بعد ماسامحك واعذارك بفلسين
وجحا لتصير املك واكشف اليجره
ولا كل ساعة جاي بحجة البسمار
هاك الباب بيعه وفكني من شره
==============
صح مرات اضيع بيتي والعنوان
بس هيهات اضيع يوم عنوانه
قوس القزح ولفي وفوكة ثمن الوان
يعني اخمصطعش مجموع الوانه
==============
الساني شكد طويل يخورس الشيطان
ما وزني بحياتي ولاكدرلي بليس
بس وياك اصير حجارة عدها عيون
واخجل كالعروس بدخلت العريس
==============
ليشوفك عمت عينه من ضواك
والمشافك عمت عينه شكد خسر
فدوة لاتطلع أخاف يفرهدوك
لأن مامنطين بالحصة شكر
==============
مو من طين ذني خدود من جام
وطبع الجام يبقه شما تعب يلمع
أخاف من ارد ابوسك تطبع شفاي
وتظل شفتي اعله خدك بعد ماتطلع
==============
ماشبهك كمر هو ايتشبه بيك
أم الكمر چا بيك تتنسه
ومن كد ماحلو لمن تمر بالناس
تكوم تغني حته الوادم الخرسة
==============
أكلني العوز اكل بس ماكلت جوعان
واكلت الساني كله ولاچته سنوني
صح اخرس صرت بس المهم مرتاح
ماكوا السان عدي يكلكم اطوني
==============
بذاكرتي مسحتك واسمك اه انزال
وانسيت الغرام وتيهت دربي
وفجأة اذكرت وكليبي ظل يهواك
ثاري اسمك طلع مستنسخه بكلبي
==============
حقي امن اختصر وياك بالشوﮒ
مو سهلة القضية وحيل خطرة
ضامي وخاف اخلصك من اصد ليك
لذلك كمت اشوفك كطرة كطرة
==============
إجيت وغير كلبي البية موجود
دخيلك صحت ياستار ربي
من كد ماتشابكنه بالاوداع
أثاري تبادلن كلبك وكلبي
==============
مانحمل شمس هنوب شمسين
صدﮒ نحترﮒ ونموت سكته
من هسه اتفق ويه السماوات
لو تطلع شمس لو تطلع اه
==============
ماشايف كبل وعيوني عثرن بيك
واول ماوعيت عيوني الك صدن
شفتك مو بشر شفتك ضوه اعله الكاع
ومن تمشي الكواكب كلهن يسجدن
==============
شاعر لو يوصفك يتعب هواي
لأن يحتاجلك فد ست دفاتر
ماشفت ابياضك انه من حيث
الشمس من شافتك لبست مناظر
==============
مريض ومايشافيني دوة الغير
واشفه من المرض لو ضكت سمك
من كد ماأسولف بيك للناس
نشدوني على اسمي وكلت إسمك
==============
ليش ماشوفك لأن بيك انه اشوف
وانه ماحبك أموت انه عليك
كام ياهو يشوفني يبوس بدي
مو لأن سيد لأن كضيت اديك
==============
أكلك مو حلو بس هذا مامعقول
لأن تدري غلط وبهاي اظلمنك
إكعد بالحديقة وبين جوري وياس
أتيه بينهن واكعد واشمنك
==============
إه مو مثل البشر بيك اختلاف
إه من كف تحير الوكفة بيك
وظهرك يباوع على خصرك يكوم
ولو مشيت يذب حچي حلكك عليك
==============
ليش متقصد تعل كلبي بهواك
وتدري أبچي الروح اذا شح الدمع
تريد تشلع كلبي فوت بكل قواك
انه عندي كليب خاطر ينشلع
==============
انه شايف في حياتي المعجزات
وكمت اعرف الزين من عند الردي
بس امر حيرني خلاني أدوخ
عمي ماشايف كمر لابس بدي
==============
خلي نكلب صفحة ونعوف اللي راح
هاي جملة نبيع بيها ونشتري
انه ماعندي بعد صفحة وسماح
بكثر ماشكيت خلص دفتري
==============
فدوة لله الناس كالت من تمر
دير بالك ياحلو لاتنحسد
عطرك اللي بيك احله من العطر
ومن يشمك يمكن يذوب الورد
==============
اه اجمل بشر شفته اعله هذا الكون
حلو ماكو بحلاتك ذرة مملوحة
سكر من ابوسك خاف بية يصير
لأن كلمن يشوفك تنسحن روحه
==============
إذا بيدك حجر لاتضرب الناس
عدها الناس إيد وكاعك احجار
واذكر بيتك المصنوع من جام
يعني حجارة وحدة يصير طشار
==============
نخاف اعليك من اعيون الذياب
بوسط عين المحنة نضمك انريد
ياأول حزين بعالم الاه
من ارموش عينك نكط العيد
==============
حاجز لاتخلي الباب فد يوم
من عين البشر لاتنحسد خاف
يبو وجه اليشع ياباب اليفيد
سور الصين لو خليته تنشاف
==============
لاتجيب الوان واحمر للشفاه
ولاتلزﮒ ارموش ساعة وتنشلع
انه من وجهك أحس رب الجمال
خالقك للناس قالب للصنع
==============
على كلبي انر كلبي من الفراﮒ
وبچة كلبي علية وهم ر كلبي
يعني الكلب يبچي والكلب مور
وانطبكن علية وتيهت دربي
==============
انه اللي أحبه مايحب الناس
ولهذا السبب دمعاتي مفضوحة
لأن اعشكت واحد دور بهالكون
ماشاف بحلاته رد عشك روحه
==============
حيرتني الدنيه هاذي
والله بالمكلوب تمشي
لليخون اتصير حمزة
وللي يوفي اتصير وحشي
==============
نختنك لمن علينه اه تغيب
إه لو مريت نشتمك هوة
طالع من البيت تضوي من الصبح
شنهي عمي يصير متريك ضوة
==============
ماأدري شوكع من اه مريت
أباوع ماكو شي طايح علية
من كد ماحلو من شفتك تفوت
أثاري انه الطحت ماأدري بية
==============
ياأرق إنسان شفته بهالوجود
المايحبك ماأظن شايف عشك
والله ادوخن وانسطر واحسدها حيل
شفتك اعله الشفة لمن تنطبك
==============
جمالك مو جلوس يوكف الناس
وتظل تنظر عليك بعين طماعة
بس كلي اعله قصتي الساعة بالباكيت
من شافت جمالك وكفت الساعة
==============
الجمال البيك ما مثله جمال
وتدري منك غار بستان الورد
إه ربك ميزك عن العباد
تطلع بتموز يكتلنه البرد
==============
اكتبت عنك قصايد عدد شعر الراس
عفتهن كلت أكتبلك جديدة
بديت اوصف شفافك كملت بعدين
د نفسي وكبل بست القصيدة
==============
شفت هوسة وبابي طايح والسياج
اشصار كلت ولنه واحد عايط
فات خلك كالي وبابك إجاه
ظل ورا يركض وجر الحايط
==============
خذت كلبي من فاتت والعقل والروح
زغيرة ودوختني وخبطت الواني
ردت للبيت اطبن من فتحت الباب
كعدت ولنه طالع بيت جيراني
==============
مو طبع الجبل ينجر بالحبال
ولا طبع الأسد يحتاج حارس
ومو كلمن ركب عالخيل خيال
ولاكلمن يشيل السيف فارس
==============
صفت مثل المسلسل عشرتي وياك
وجزت حلقات من عدها كثيرة
وانه من الحلقة الاولى لعت بيك
واظل اهواك للحلقة الأخيرة
==============
داخوا بالحشر للجنة ماودوك
تتعارك عليك الشيعة والسنة
ودوك لجهنم بيها ماخلوك
خافوا من جهنم تنكلب جنة
عليك شكد اخاف شكد اداريك
حبيبي اتمنه داخل كلبي اضمك
إذا مو إه بيها الدنيه شتفيد
ولك همزين ابوك اتزوج
==============
دخفف من جمالك رجل ذب ايد
ذب شعرك امعود لادذب خصرك
بس تبقه حلو إي وحك من سواك
لو مو تذب ايدك لوتذب كلك
==============
صدك كلش حلو وعندك حسن ماصار
وصدك تكتل مشيتك من تلف خصرك
خل اسكت بعد ماداعي اوصف بيك
إذا شفتك تريد تبةسك بحلكك
==============
من جمالك كلها وكفت
وانه غامرني السكوت
لأن بس احچي بجمالك
يصعد السكر واموت
==============
على اعيونك تصد وتشتكي الناس
چم فارس إجه وبرموشهن طاح
إذا صديت مو بس تصطر البال
إذا عالكاع تنظر تسطر الكاع
==============
أمي ماتت بالمفخخ والدمار
كلت ماأدفنها خل تشبع هوه
هيه كل يومين ثالثها انفجار
متاني ابويه ايموت وادفنهم سوه
==============
جيت اشوفك مالكيت بعيني شوف
الشوف كبلي اتعنه راح ايشوفك
ردت اعوفك ماشفت بيدي چفوف
لأن راحن چلبن بچفوفك
==============
جماعة اتكول عنك مو بشر حاشاه
وجماعة اتكول حتما مو بشر حتما
واختلفوا عليك وبيك مايدرون
إنسان وملاك بواحد انجمعن
==============
يا عيسى ابن مريم والله محتار
شريد اكتب عليك وابتدي منين
يبدي البشر نطفة ويهي بموت
واه اول بشر مامر بالاثنين
==============
الشوارع من تمرها تصير كلها حلوك
حتى تبوس جدمك من تمر يفلان
ليلية اعله بالي وأظل صافن بيك
عالحيطان ارسمك واشبك الحيطان
==============
ماأريدن يجهد السانك كلام
انه أفتهمك إذا تهمس همس
اليوم ماشفنه شمس وكت الشروق
ليش ماتصعد تصير اه شمس
==============
ياورد الأجيبه بمولدك يالون
ويالون اليناسب كلي وي عيدك
من جبت الورد شفت انه موقف صار
الورد منك خجل دنك يبوس ايدك
==============
شعرك طار فوك اعيونك الحلوات
واذا طكه الهوه يتلاعب بخصرك
يمكن ماي شعرك واعتقد شلال
واذا شعرك صخ تغسله بشعرك
==============
أحبك إه احبك ماأحب الغير
واكلك غير حبك ماأحبن
كون انه ببحر واتمنى أغرك بيك
خاطر من اموتن بيك اموتن
==============
أرد اسألك ياحلو وشهذا الجمال
كلبي من شدة جمالك بي هوس
يصير أمك بيك متنسية بغزال
واني بيه يصير متنسية بعدس
==============
شوصفنك حلو مابيك ذرة عيب
وابدع بالخلق من صورك ربك
من كد ماعذب ماتشرب اه الماي
خاف الماي يطمع بيك ويشربك
==============
صباح الخير اكلك واحنه نص الليل
لأن خدك ضوه وياليل اليسده
تسد عين الشمس لو فتحت تك عين
لاتفتح اثنين عيونك اتهده
==============
عجوز من الصبح حطت جدرها يفور
ومظرة إبنها يجيب مسواكه
الساعة العصر دكوا عليها الباب
من لحمات ابنها انطوها علاكة
==============
عذرا ماأمدحك خايف من الناس
وتدري الناس عدها حلوك مفحة
ولأنك إه روحي وخايف يكولون
شكثر مغرور هذا ويمدح بروحه
==============
عقل عندي شتظن واتسودن اعليك
بقه بس عقلي هذا وجبته بالدين
أمشي بلاوعي واركض بالدروب
إجه مخبل سألني الخبلك وين
==============
يالشفتك بحر وتروي كل عطشان
واليصفن بشفتك ينسبي سباية
الناس من العطش تركض وره الماي
واه الماي يركض شربك مايه
==============
جلست والخوف بعينيها
تتأمل وطن ماشايف الشافه
قرت فنجانه طلعت عبوة بالفنجان
طك فنجانها وماتت العرافة
==============
عليك الناس تحچي اشكال والوان
وتكول اه الذهب والذهب من ساسك
بعد بيمن نقارن لو نحط مقياس
نقيسك بالشمس واه الكمر قاسك
==============
من تمشي حبيبي تعـوذ الشيطان
بكلوب البشر خليت چـم علـة
جدمك بالأرض ماخلة أي نيشان
ولأن شفاف جسمك ما ترك ضله
==============
إذا اكلك حلو چذاب اصير اوياك
وحلاتك بالوصف غلبت حلاتك
واذا شفافك عسل ومطعمة بنعناع
حظر تجوال لو طلعت لهاتك
==============
أسجد من اشوفك واشكر السواك
خلي بماي شوكك روحي تظة
يل من طين واكفر لو كلت من طين
بس طينك ذهب ومطعم بفظة
==============
إندفن كرسي الحكومة وكلنا نرتاح
وانه من الناس كلت ارتاح راسي
وصح زخت مطر بس مطرت سلاح
والكرسي ارى وخضر كراسي
==============
يالجمالك غار مـن عنده الجمال
وبجمالك كلي هـم يحصل بشـر
بطن أمك من چ متنسية بيش
رحمة للعباس متنسية بشكر
==============
من ماي الورد رب الحسن سواك
ومن جابتك أمك بيك ماحست
ولروعة جمالك عندي بس تفسير
أمـك بالنساوة بيوسف تنست
==============
ما نكدر نوصفك حتى بالأشعار
جبل من نوصفك مانكدر نلوحك
لذلك جبنه ورقة وقلم وانطيناك
واه براحتك ضل وصف بروحك
==============
يالوصفك مدارس جيل يتبع جيل
وحسنك صار منهج حتى للروضة
خصرك درس اضافي وعالدروس امتاز
عفنه دروسنه وبس درسك نحفضه
==============
إذا اه محب وياك عندي اعتاب
واعتبره بس كون مترفضه
ومضت شعر حسنك فتت صحنه الله
صحنه الله غير تعيدها الومضة
==============
غبت أيام عنچ مانشدتي شبيك
ولامرة اتصلتي وكلتي اشلونك
واظن كلبچ تغير وانه احسن بيچ
أظن الياهو كوكل غير اضنونچ
==============
نيوتن والتجاذب كلها هـاي اسرار
بس لغزچ يحلوة بإيدي مفتاحه
نزلت للأرض خجلانة حقها بهاي
شلون كبال خدچ تبقى تفاحة
==============
يستحي ظلچ يظم روحه وراچ
وحقه ظلچ مـن جمالچ لو خجل
إي لو نحلة عـرفتچ من زمان
اني أعرف النحل بس اي عسل
==============
سبحانه الجليل شلون من سواك
وانطاك الحسن واللولة ماهيه
ردت شوية منك بيه صار سنين
طابك عالسرة وماتلتفت ليه
==============
كيمر چنها شفتك والحلك ماعون
والخد العليك تكول كاهيه
إلمن جاي يمي وانه الك جوعان
جيتك هاي حرشة لو حسن نية
==============
كالوا وصفوا عنك حچولي هواي
وكالو كل حلو هم تلكه بي لولة
من شفتك شفت مابيك هلكد لول
بس عين التشوفك تنكلب حولة
==============
چا ليل يمنه وشفنه شمسين
البشر كلهم احتاروا بالجره وصار
وك چان احتركنه وهاي نارين
الحمد لله حبيبي خدودك صغار
==============
فصلت البشر سويتهم تمثال
واه الروح بالتمثال خليتك
حجر كل البشر بس كاموا يحنون
قطرة نطيتهم من بحر حنيتك
==============
حبيبي بشفتك ما ابوس انوب
واذا بستك أكضي البوسة خايف
لأن شيكظها روحي وهنه جكليت
واه شلون تبقه بلا شفايف
==============
لا صل الحينه الناس ضجت بيك
شارعنه اشتكالي وزعلوا الجيران
إه شعرفك سلمت وتعديت
ماتدري وراك تطلكت نسوان
==============
الدنيا لمت كل دولها
وبالشعر سوت سباق
وبس اجه وكال انه حاضر
فاز عالدنيا العراق
==============
دك بابي مرة الفرح كلت شعجب غلطان
لو فاقد الذاكرة لو تيه العنوان
رد وسألني الفرح دليني بيت فلان
مرة بحياتي الفرح جاني وطلع سكران
==============
طعم شفتك عسل والوجنة رمان
وتره روحي بغر حيل مجبورة
لأن طعمك حلو والناس حساد
لازم وي حلاتك تخلط مرورة
==============
يالمهدر جمالك مثل چاي وهيل
وزن لامحترك لافاهي لاشايط
أمس بيتك وكع والصوچ منك چان
اعله شيلة صورتك حايط ردم حايط
==============
أنه بجيبي لحضرتك صورة ماشيل
أشوفك بيها من يشتد حنيني
أنه من اشتاك امد ايدي على العين
أطلع صورتك من جيب عيني
==============
إكتب ياقلم خل تشهد الايام
والتاريخ شاهد يبقى عالساحة
الثابت بالكلب ماينمسح للدوم
إلا الكلب نفسه يصير مساحة
==============
من تمشي الصبح خل عينك اعله الكاع
لأن نظرات عينك تكتل ابنادم
واذا بالليل تطلع عمي طب بساع
أذا هيه الصبح وادمنه تترادم
==============
عنك لورحت ماطول هواي
الرموش فراكهن حسبة ثواني
وامانة لغيري وجهك لاتراويه
واذا تشتاك سولف وي مكاني
==============
انه أدري بروحي أسود مو حلو
واه أبيض والحسن بيك اكتمل
اني صح اسود ولكني بلال
واه صح ابيض ولكنك هبل
==============
تره صرنه بغيابك مثل يعكوب
من كد البچي بعدك عمينه
واذا مابيك جيه ويوسف تصير
بس ودي قميصك لاتجينه
==============
اني حبيتك غفل ماأدري بيك
وخاف ما تدري أزيدنك علم
الله كاتبلي أنام بهيچ يوم
تحلمت بيك وطلعت من الحلم
==============
كمت اغمض عيني خاطر ماتشوف
لأن دوم عيوني يغويها النظر
وخاف من تشوفك اتخيل عليك
وتاخذك مني واموت من القهر
==============
إه شكد مميز والحلاة البيك
تغري اللي ينظرك تسحره بعينك
سنينك 16 ماواصل العشرين
شتذب من فلك لوزادن سنينك
==============
فدوة لاتزعل إذا نسأل عليك
الدنيه ظلمة وحارة ومامش فجر
كلوب عدنه ومروحة وعمك فقير
وردنه نص امبير مـن خدك نجر
==============
لأن إه ورد نزعل إذا تنداس
وعليك نموت كلنه ومحد يدوسك
ولأن إه حلو ونخاف نلزك بيك
كمنه انرش عليك اميـة ونبوسك
==============
الجائز والمحال انطبكن بدنياك
وحديت الجمال وصرت إه الحد
يبوس الشفة خدك ع كل الناس
وبعين اليشوفك حتى رجلك خد
==============
طبع بالناس تلعب من يجي العيد
واه العيد هوه اليلعب اوياك
وچذب مو صاك إه الصاك تربيع
لأن لو شاف حسنك يفقد الصاك
==============
يومية بحلاتچ عركة انه اوياي
أسولف بيچ فني واوصفج فني
إذا لمن دخلتي قراية النسوان
الملاية فقدت كامت تغني
==============
سألو هم تحبه وجاوبتهم حيل
أحبنك كبل لاينولد جدي
أمك من كثر كعداتي يم البيت
إنطتني ربع حسبالها مجدي
==============
أطرد بالغزل يومية بالليل
يرد ويكلي تكتبني أريدك
أكره ذوله ليبوسون بالإيد
واحب روحي كمت من بست إيدك
==============
حبيبي من تمر يتصدع الكون
والشارع يتيه بطوله وبعرضه
إذا ومضة شعر ما وضفتها شلون
صدكني من ابوسك تعتبر ومضة
==============
بس اه اعتقد تستاهل العين
وما اكدر حبيبي بيوم اعوفك
واذا ابالي إجيت واني مشتاك
من بالي أطلعك حتى اشوفك
==============
0 التعليقات:
إرسال تعليق